O lenei upegatafailagi “laumuaotumua.org” ua fausia ina ia silafia ai e alo ma tamafanau o lenei nu’u o Afega ia galuega o loo faatino i Samoa nei aua le manuia o si o tatou nuu o Afega nei ma ā taeao.
E aofia ai atinae mo le manuia lauteleo le nu’u; puipuiga o eleele ma fanua o le nu’u, po o le Faatafafa a Fata ma Maulolo; atoa ai ma le puipuia o le fatuaigatausi a lenei nu’u o Afega i tulaga faaleaganuu i le va ma isi afio’aga tainane le vatapuia ma Tamaaiga ma tupu o Samoa.
E taua tele ona silafia tulaga e uiga i lenei upegatafailagi:
- O le Gagana Faaaloalo e faaaogaina
- Ua na o mataupu ua faai’ugafonoina i le Fono a Alii & Faipule poo le Komiti o Atina’e a Afega e mafai ona faasalalauina i luga o lenei upegatafailagi
- E faamanino ai faaiuga o faamasinoga e aafia ai le nu’u e pei o faamasinoga i eleele ma nu’u tuaoi ona ua matauina le ave seseina i faaslalauga a le social media
- E le faasalalauina ai ni mataupu e patino i aiga taitoatasi se’i vagana o se mataupu ua aafia ai Alii ma Faipule.
Talosia ia aoga lenei faasoa e auala atu i le upegatafailagi o le laumuaotumua.org e fesoasoani e faamanino atili ai nisi o mataupu taua mo le silafia e tamafanau ma le mamalu o suli ma feoi o Afega o loo afifio ma alala i atunuu mamao.
E mamae le tava’e i ona fulu, a o le Samoa i lana aga ma lana tu, i si ona lava nu’u!